بما اني بقالي فترة مش بكتب من ساعة ما قلت
اني موقفة كتابة فترة تحت البنود المعتادة (قصاصات-مقتطفات-مقالات-روايات –قصص)
وفعلا مكتبتش من ساعتها غير قصتين قصيرتين منزلتهمش لسة..ممكن اتكلم معاكم معاكم
شوية ونعتبره تهييس..أو فضفضة..أو هلوسة ..
.............
.............
اكتشفت فجأة اني بحب حاجات غريبة جدا..وساعات
عبيطة جدا..مثلا..
بحب قوي لما أكتب عربي وأنسى أحول اللغة من
انجليزي لعربي عالكيبورد فيظهر قدامي حروف انجليزية لا معنى لها بس جوجل أو يو
تيوب يفهمني..بضحك كدة وأقول للكمبيوتر :بحبك وانت زكي J
وبحب لما ازهق وأجيب أخري فاسمع محمد منير
وأغنية ربك لما يريد وهو بيقول( ربك لما يريد..أحلامنا هتحقق..وكلامنا
هيتصدق..والغايب هيعود)..رغم ان وقت طويل والحاجات الثلاثة مبتحصلش بس كل ما
أسمعها اقول في سري من غير ما انتبه..ان شاء الله هيحصل
بحب لما أبقى راجعة من برة وألاقي ماما عاملة
أكل من اللي بيعجبني J
بحب أعمل أشكال وأنا باكل وأنا بشرب في أي
حاجة ينفع فيها التشكيل..وش النسكافيه..كابتشينو..آيس كريم..ميلك تشيك عليه صوص
لونه مختلف..بسبوسة أو كنافة أو حتى تارت عليه كريمة..أي حاجة ..الناس بتستغرب
الموضوع ده بالذات لما بكون برة..أظن هتبقى مشكلة لما اتخطب واخرج معاه..مع اني مش
هلعب في العصير بتاعه يعني !
بحب ألعب لغاية دلوقتي بالمكعبات ..وفرحت
جداااا لما أختي جابتلي هدية علبة مكعبات كبيرة من اللي فيها قطع كتير صغيرة..وبحب
البازل..الحاجات دي حلوة بجد..تحس انك بتبني العالم اللي يعجبك وتعيش فيه..غير
انهم ملونين طبعا.
بحب المرجيحة التقليدية وكان نفسي يكون عندنا
واحدة في البيت L ..
..................
معرفش ليه مبقتش بكتب..هي دي حالة عامة ؟لأن
ناس كتير بتكتب مبقتش بتكتب برضه ..هل احنا عايشين نفس الحالة اللي عاشها الكتاب
الشباب بعد الحرب العالمية ؟ولا دي حالة عندي لوحدي..فجأة مش حاسة الكتابة..وانا
بحب اكتب لما أكون حاساها بس..تفتكرو هرجع تاني؟
.........
دايما بحس ان فيه حاجة غلط بيني وبين مصر..حاجة
ناقصة في علاقتنا ببعض أو حلقة مفقودة......بس مش قادرة أوصل لإجابة السؤال الأزلي
في حياتي..أنا حبيتها أكتر من اللازم ولا عمري ما حبيتها كفاية ؟
..........
نفسي البنات يشيلو من دماغهم فكرة (كل
الرجالة كدة) اللي جايبانا ورا دي..زي ما نفسي الأغلبية الصامتة تشيل من راسها فكرة (كل
الناس عايشين كدة)..اللي برضه جايبانا ورا .
.......
ونفسي مرة اكل برة في أي مكان واخلص طبقي J .
.....
كان نفسي الثورة تخلصنا من قرف الأفلام التيييييييت اللي بتتعمل دي ..بس
بعد ما شفت إعلانات افلام الصيف اكتشفت ان احنا لسة قدامنا كتير.
..........
كل مرة وأنا مسافرة للشغل بعدي في الموقف جنب محل مشغل قرآن بصوت عالي وبعده بخطوتين واحد تاني مشغل (أغاني توكتوك)
بصوت عالي جدا ..التناقض بين الصوتين بيبقى مرهق للأعصاب عالصبح..وكل مرة مش بقدر
امنع نفسي من التساؤل..ايه نوع الطبلة او مراكز الاحساس بالصوت والموسيقى اللي في
دماغ الناس اللي بتحب الاغاني والاصوات دي ؟
.........
أرجوكم بلاش حد يستغرب ويزبهل ويندهش جدا
لما يلاقي حد معروف عنه انه دماغه
كبيرة وعالية مستغرق في التفكير جدا في شيء تافه قوي..ده معناه أنه مهموم بحاجة
كبيرة قوي عليه..وعليك..
................
الفيس بقى ممل..أو أنا اللي بقيت مملة لنفسي وزهقانة من كل حاجة..مش عارفة
انتو ايه رأيكم؟
ليست هناك تعليقات:
إرسال تعليق