قصاصات ..تهييس

كل فترة كبيرة بنزل قصاصات زي دي  تحت عنوان تهييس بكون كاتباها بالعامية..مع أني بحب الفصحى أكتر, ليه ؟

..مش لازم على فكرة كل حاجة يكون ليها تفسير منطقي..هو كدة وخلاص..

..............

امبارح ركبت عربية سوزوكي, كان السواق محترم قوي..محترم زيادة عن اللزوم بالنسبة لاي سواق شفته في حياتي..بنته تقريبا كانت راكبة وهي طفلة صغيرة جاية من المدرسة , ركبت انا وقالي اهلا وسهلا....وبعدين وقفتنا واحدة كبيرة شوية ..مكنتش هتقدر تطلع عشان العربية عالية فتحلها الباب اللي قدام وقالها اتفضلي اهلا وسهلا..ووقالها امسكي في الايد اللي عند الازاز وعلى مهلك..كنت حاسة اني بحترمه جدا..

فكرني قد ايه فيه ناس بسيطة بس ممكن تبقى كبيرة قوي في نظر نفسها ونظر الناس...

.................

امبارح برضه في العيادة جاتلنا واحدة عجوزة بابنها , قعدت تدعيلي كتير , وجنبي ممرضة قالتلها طيب وأنا يا حاجة مليش نصيب ؟ فدعيتلها وقالتلنا انتو متجوزين ؟ فالممرضة قالتلها لسة..فقعدت تدعيلنا كتير..حسيت الممرضة فرحانة قوي بالدعوة..

ساعات دعوة الغلبان ممكن تفرق كتير ..

.............

وأنا وخطيبي بندور في إعلانات النت عن شقة ..لقينا شقة ب 37 مليون جنيه في الزمالك ..كبيرة بس في النهاية مجرد شقة..صحيح قعدنا نضحك..بس برضه مكنتش مستوعبة أننا في مصر وعندنا ثلث الشعب تحت خط الفقر..وثلثه بيتأرجح على الخط ده..صعب تقتنع أن فيه ناس عايشة الحياة دي وبتنام بليل عادي !
فكرت في سؤال غريب وقلته لخطيبي..

هو لو حتى معانا كل المبلغ المهول ده..أقف قدام ربنا يسألني عملتي ايه ب 37 مليون جنيه أقول جبت بيهم شقة ؟

!!!!!!!!!!!!!!!!!

...............

لما بشوف أطفال شوارع بيلعبو ..ولما أعدي بالأتوبيس قريب من مناطق العشوائيات وألاقي مساحة فاضية معتبرينها ملعب كورة..أو حتى في الخانكة و الأماكن البسيطة اللي ممكن الناس تتريق عليها وتقول ياي ..ازاي حد يقعد هنا..

كل اللي  بفكر فيه أن الإنسان بيبقى غبي قوي ساعات..لما يفضل يفتكر أن المستوى المادي العالي هيرحه , الفلوس حاجة زي الأكل..لو جعان هتاكل اللي  قدامك وخلاص..لو مش جعان والأكل كتير هتفضل تفكر وتحتار تاكل ايه وتسيب ايه ونص وقتك هيضيع في الحيرة والنص الثاني في الندم انك أكلت جزء ومقدرتش تستمتع بالباقي..

بلاش حد يبص للناس دي بشفقة قوي..ساعات بيبقو أحسن مننا كلنا لأن همومهم على قدهم واحتياجاتهم برضه على قدهم..وبالتالي أبسط حاجة بتسعدهم..ممكن سعادة صعب قوي حد من الميسور يوصلها لأن سعادته مرتبطة بكلاكيع كتير ..ملهاش أي لازمة..

................

وحشتني المرجيحة بتاعة عم حلاوة..الله يرحمه , لقيت زيها من مدة قدامي بس منفعش اركبها..

.............

لما ببقى راكبة مواصلات , أكتر حاجة بتفرحني أني أشوف زرع في الطريق , شجرة ملونة ..وبالذات البنفسجي المنتشرة في الشهر ده..أو الحمراء اللي هتبان الشهر الجاي ..والورد بتاع الربيع..

لو معودتش روحك أنها تشوف الجمال قدامها وتركز معاه..هتبقى خسرت كتير..

.................